Суға кеткен адамдардың 70%-ы суға түсер алдында алкогольді ішімдіктерді пайдаланған

АСТАНА. 31 мамыр. ҚазАқпарат - Астанада суға кету жағдайлары тұрақталып келеді, деп хабарлады Астана қаласының Төтенше жағдайлар департаменті суда құтқару қызметінің бастығы Георгий Саврук.

«Былтыр 15 адам суға кетсе, оның екеуі саяжай аумағында, өзен бетіне мұз енді қата бастаған кезде суға батқан екен. Олардың бірі - кішкентай бала. 32 адам тосын келген ажалдан құтқарылған. 2011 жылы 14 адам қазасы тіркелген. Суға бату оқиғаларының біршама тұрақталғанын атап өтуге болады. 2010 жылға қарағанда, 2012 жылы судағы апатты жағдай 5-6 адамға қысқарған», - деп түсіндіріп өтті Г. Саврук.

Оның айтуынша, көп жағдайда адамдар суға мас күйінде түскендіктен батып кетіп жатады. «Суға кету жағдайларының 70 %-ға жуығы адамдардың суға түсер алдында алкогольді ішімдіктерді пайдаланғандықтан орын алады. Ал 98 %-дан астамы демалуға рұқсат берілмеген жерлерде шомылу, таныс емес жерлерде сүңгу салдарынан», - деп хабарлады Г. Саврук.

Атап өтерлік жайт, жаздың ыстық күндері астаналық саябақтағы жағажайға келушілер саны орташа есеппен 1500-ден 2000-ға дейін жетеді екен. 2012 жылдың жазғы маусымында Нұра-Есіл каналында 2 адамның қайтыс болуы тіркелген.