Сыр елінде құрылыс және инфрақұрылым салаларында қандай жұмыс атқарылуда
Атап айтқанда, биыл облыс әкімінің тапсырмасына сәйкес Сыр өңірінде энергетика және тұрғын үй-коммуналдық шаруашылығы саласында 17,3 млрд теңгені құрайтын 106 жоба жүзеге асырылуда.
Солардың бірі Қызылорда қаласында көпбалалы аналарға пайдалануға берілген Бәйтерек тұрғын ауданындағы тұрғын сектордың инженерлік-коммуникация инфрақұрылымын дамытуға 1 млрд 060 млн теңге бөлінсе, Жаңақорған кентіндегі 10/0,4 кв электржелілік жүйені жаңғыртуға 898 млн 787 мың теңге қарастырылған.
Сонымен қатар Қызылорда қаласы мен Жалағаш, Шиелі аудандарында тұрғын үйді жаңғырту жұмыстарын жүргізуге 622 млн 160 мың теңге бөлінді.
Айта кету керек, Қызылорда қаласының тұрғын үй қорында 800-ден астам көпқабатты тұрғын үй болса, соңғы 10 жылдың ішінде 185 көпқабатты үйге жаңғырту жұмыстары жүргізілді. Биылғы жылы да осы жұмыстардың жалғасы ретінде облыс орталығындағы 11 үйге жөндеу жүргізіледі.
Сонымен қатар биыл мемлекеттік бюджет есебінен құрылыс саласында жалпы көлемі 60,6 млрд теңгені құрайтын 108 жобаны жүзеге асыру жоспарланған.
Оның ішінде облыстық Құрылыс, сәулет және қала құрылысы басқармасы арқылы – 27, Арал ауданында – 5, Қазалы ауданында - 13, Қармақшыда – 13, Жалағаш пен Сырдарияда – 4, Шиеліде – 5, Жаңақорғанда – 2, Қызылорда қаласында 35 жоба жүзеге асырылмақ.
Бұл жобалардың ішінде облыстық қан орталығы, неке сарайы, мәдениет саласындағы көпсалалы кешен және 2 оқу корпустарының құрылысы бар.
Аймақ басшысы Нұрлыбек Нәлібаевтың тапсырмасымен жобалардың тиімділігін әрі сапасын қадағалайтын арнайы Кеңес құрылып, жұмыс жасап жатыр.
Бұл кеңестің жұмысы ең алдымен бюджет қаржысының тиімді пайдалануын қадағалау және тұрғындар үшін қажетті нысандарды салуды көздейді.
