Сырдарияға батып кеткен 11 адамның сегізінің денесі табылды
ТҮРКІСТАН. ҚазАқпарат - Түркістан облысында Сырдария суына батып кеткен 11 адамның сегізінің денесі табылды, деп хабарлайды ҚазАқпарат тілшісі.
Сырдарияға шомылуға барып, батып кеткен адамдарды іздестіру жұмыстары тоқтаусыз жүріп жатыр. Әзірге 11 адамның 8-інің денесі табылды. Олардың төртеуі 16 жасқа дейінгі балалар болса, қалған төртеуі - ересектер. Іздестіріліп жатқан үш адамның екеуі - жасөспірімдер.
«Сағат 21:00-де жағадан 30 метр қашықтықта бір адамды таптық. 22:50 тағы бір адамның денесі жағадан 6 метр қашықтықтан табылды. Оқиға орын алған аумақтан 100 метр жерде іздестіру жұмыстары жалғасуда», - делінген Түркістан облысы ТЖД-нің ақпаратында.
Еске салайық, оқиға бүгін Отырар ауданында болды. Сырдария өзеніндегі автокөлік көпірінің маңында 11 адам суға түсуге арналмаған жерде шомылып, батып кетті. Барлығы 4 ағайынды отбасының мүшелері.
Бұған дейін 6 адамның денесі табылғаны туралы хабарланған болатын.
