Таиландта болған қос жарылыстан 50-ден астам адам жараланды

АСТАНА. ҚазАқпарат - Таиландта сауда орталығында қос жарылыс болды, деп хабарлайды 24kz.

Оқиғаның салдарынан 56 адам жараланып ауруханаға түскен. Олардың екеуінің халі ауыр. Оқыс оқиға корольдіктің оңтүстігіндегі Паттани провинциясында болған. Алдымен сауда орталығына кіреберісте бомба іске қосылған. Артынша осы ғимараттың көлік тұрағында жарылғыш зат қойылған темір тұлпардың күлі көкке ұшты.

Әзірге ешбір топ шабуылдарды өз мойнына алған жоқ. Жалпы өңірде оңтүстік аудандардың елден бөлінуін талап етіп жүрген топтар әрекет етеді. 10 жылдан астам уақыт ішінде олардың қастандық әрекетінен шамамен 6 жарым мың адам көз жұмған.