Таиландта туристердің автобусы апатқа ұшырады

АСТАНА. ҚазАқпарат - Таиландтың орталық бөлігіндегі Патхумтхани провинциясында болған жол-көлік апаты салдарынан алты адам қаза тауып, 50-ге жуық адам зардап шекті, деп хабарлайды ҚазАқпарат тілшісі The Bangkok Post-қа сілтеме жасап.

Полицияның хабарлауынша, Бангкок қаласына қарай жүрген екіқабатты автобус 6 қаңтар күні жергілікті уақытпен cағат 03:20-да (Астана уақытымен сағат 04:20) аударылды. Жолаушылардың айтуына қарағанда, жол апаты кезінде жаңбыр жауып тұрған, ал автобус жүргізушісі басқа көлік құралымен соқтығыспау үшін тежегішті басып қалған.

Жол-көлік апаты салдарынан бір ер адам, төрт әйел және бір сәби қаза тапты. Сонымен қатар, 50-ге жуық адам түрлі жарақат алған. Құтқарушылар зардап шеккендердің барлығын жақын жердегі ауруханаларға жеткізді.

Полиция сұрау жүргізу үшін ауруханаға жеткізілгендердің арасында болуы мүмкін автобус жүргізушісін іздеуде.

Алмас Жексенбеков