Таиландтағы танымал курортта өрт шығып, 11 адам қаза тапты

АСТАНА. KAZINFORM — Таиландтың Пхукет курорттық аралындағы төрт қабатты ғимаратта болған өрттен 11 адам қаза тауып, тағы 16 адам зардап шекті, деп хабарлайды CNA агенттігі. 

Пожар на популярном курорте Таиланда унес жизни 11 человек
Фото: CNA

Таңертең мотоцикл жалдау орны орналасқан коммерциялық ғимараттан өрт шығып, жалын өзге бөлмелерге тараған. Өртті ауыздықтауға мамандар екі сағаттай уақыт жұмсады.

Өрт сөндірілгеннен кейін ғимараттан қаза тапқан 11 адамның денесі табылды. Олардың арасында Таиланд пен Мьянма азаматтары бар. Ал өрттің шығу себебі анықталып жатыр.

Сондай-ақ түтінге уланып, сынған әйнек сынықтарынан жарақат алған тағы 16 адам ауруханаға жатқызылды. Reuters агенттігінің полицияға сілтеме жасап хабарлауынша, қаза тапқандар мен жараланғандар арасында туристер жоқ.

Таиландтағы барлар мен түнгі клубтардағы қауіпсіздік талаптарының сақталуы көптен бері қоғам назарын аударып келеді. Шілде айында Бангкоктағы адам лық толы барлардың бірінде өрт шығып, 40-қа жуық адам қаза тапты.

Билік өкілдерінің мәліметінше, өрттің шығуына қысқа тұйықталу себеп болған.

Бұған дейін Қытайдың солтүстігіндегі ғимарат өртеніп, 14 адам қаза тапқаны хабарланған болатын.