Талдықорғандағы Ілияс Жансүгіров атындағы университетке 45 жыл толды
ТАЛДЫҚОРҒАН.ҚазАқпарат - Бүгін Талдықорғандағы І. Жансүгіров атындағы Жетісу мемлекеттік университеті 45 жылдығын атап өтті. Оқу орнының айтулы датасы шеңберінде ғылыми-зерттеу институты ашылды, деп хабарлайды ҚазАқпарат тілшісі.
ЖОО ұжымы мен студенттерін мерейтойымен облыс әкімі Амандық Баталов құттықтап, университет жанынан құрылған ғылыми-зерттеу институтының ашылуына қатысты. Институттың құрамында екі - биогеотехнология және агробиотехнология зертханалары бар. Олардың жұмысы тау-кен және аграрлық өнеркәсіп салаларына инновациялық биотехнологиялық тәсілдерді енгізуге негізделеді. Қазіргі кезде институтта докторлар мен ғылым кандидаттарын қосқанда 9 қызметкер бар. Зерттеу жұмыстарына «Биология» және «Экология» факультеттерінде оқитын студенттер де тартылады.
Институт жұмысымен кеңінен танысып, зертхананы аралаған облыс басшысы осындағы қызметкерлердің жұмысына табыс тілеп, тілектестігін білдірді. Сонымен қатар олардың агробиотехнология саласындағы еңбектері бүгінгі күн үшін, әсіресе біздің агро-индустриалды облысымыз үшін және ауыл шаруашылығына инновацияларды енгізу жұмысы атқарылып жатқан шақта аса маңызды саналатынын атап өтті.
Мұнан соң Амандық Баталов ЖОО-ның 45 жылдығына арналған салтанатты шараға қатысып, құттықтау тілегін жеткізді.
«Қазақ поэзиясының Құлагері Ілияс Жансүгіровтің атымен аталған университет жарты ғасырға жақын уақыт ішінде отандық білім жүйесінде өз орны мен дәстүрі бар білім ордасына айналды. Университет түлектері өңіріміздің экономикасының әр саласында еңбек етіп жүр. Әсіресе, педагог мамандардың 90 пайызға жуығы - Жетісу мемлекеттік университеті даярлаған кадрлар. Тәуелсіздіктің алғашқы жылдарында Президентіміз Нұрсұлтан Әбішұлы Назарбаевтың университетке арнайы келіп, дамудың басты бағыттарын айқындап беруі оқу орнының өркендеуіне тікелей әсер етті. Елбасымыздың жоғары білім беру жүйесін дамыту жөніндегі тапсырмаларына орай, бүгінгі таңда университетте заман талабына сай жас буынды оқытып, тәрбиелеу жақсы жолға қойылған. Жетісудың басты білім ордасында оқыған жастарымыз облыстың, еліміздің абыройын асыра берсін! Университет ұжымына мол табыс тілеймін!», - деді А. Баталов.
Білім ордасында облыс әкімінің грантымен білім алып жатқан студенттер оқуын оқу жылының соңына дейін аяқтауы үшін 35 млн теңгенің сертификатын табыстады. Сонымен қатар облыс әкімі университет ректоры Куат Баймырзаевқа облыс әкімінің алғыс хатын және білім ордасының бірқатар қызметкерлеріне құрмет грамоталарын тапсырды. Шара барысында Амандық Баталовқа «Құрметті профессор» атағы берілді.
Салтанатқа Ілияс Жансүгіровтің ұлы Саят Жансүгіров арнайы қатысты. Жиын университет түлектерінің, оқытушыларының, студенттер мен қонақтардың ізгі тілектерімен жалғасты.
Жалпы, І. Жансүгіров атындағы Жетісу мемлекеттік университетін құрылғаннан бері 49000 түлек бітірген. Олардың 35 мыңы - педагогикалық мамандықтар бойынша тәмамдаған. Түлектер арасында ғарышкер-сынақшы, авиация генерал-майоры, «Халық қаһарманы» Айдын Айымбетов, Атлантадағы Олимпиада ойындарының жүлдегері, қола медаль иегері Мәулен Мамыров та бар. Бүгінгі күні университетте 6 мың студент оқиды. Олардың ішінде 40-ы мамандық бойынша - бакалавр, 21-і - магистр, 6-уы - докторанттар. Биылғы жылы университет тұңғыш рет Еуропа мен Орта Азияның дамушы үздік жоғары оқу орындарының арнайы рейтингінде алдыңғы қатардағы 300-діктің ішіне кірді. Ал ұлттық рейтинг бойынша көпсалалы ЖОО 12-ші орында.
