Талғат Қалиев Ауғанстан мәселесіне қатысты БҰҰ отырысына қатысады
АСТАНА. ҚазАқпарат – 2023 жылғы 1-2 мамыр аралығында Доха қаласында Біріккен Ұлттар Ұйымы бас хатшысы Антониу Гутерриш БҰҰ-ға мүше мемлекеттердің Ауғанстан бойынша арнайы өкілдерімен кездеседі. Бұл туралы Сыртқы істер министрлігінің ресми өкілі Айбек Смадияров мәлім етті, деп хабарлайды ҚазАқпарат тілшісі.
«Аталған кездесудің мақсаты – Ауғанстандағы ахуал бойынша ортақ мақсаттар төңірегінде халықаралық өзара іс-қимылды жандандыру. Қазақстан Республикасы атынан бұл іс-шараға ҚР Президентінің Ауғанстан бойынша Арнайы өкілі – Қазақстан Сыртқы істер министрлігінің Ерекше тапсырмалар жөніндегі елшісі Талғат Қалиев қатысады», - деді А. Смадияров елордада өткен баспасөз мәслихатында.
Бұдан бұрын хабарланғандай, 2023 жылғы 26-27 сәуірде Қазақстан Премьер-Министрінің орынбасары – Сыртқы істер министрі Мұрат Нұртілеу бастаған қазақстандық делегация Сиань қаласында өтетін «Орталық Азия –Қытай» диалогтық форматтағы Сыртқы істер министрлерінің 4-ші кеңесіне қатысады.
Сонымен қатар осы аптада Қазақстан Премьер-Министрі Әлихан Смайыловтың Иран Ислам Республикасына сапары өтеді.
