Тараз қаласында орта мектептің ғимаратына жарылғыш зат қойылды деген хабар түсті
АСТАНА. Қыркүйектің 28-і. ҚазАқпарат - Тараз қаласында орта мектептің ғимаратына жарылғыш зат қойылғандығы туралы анонимді хабар түсті.
Қазақстанның Төтенше жағдайлар министрлігі таратқан ақпаратқа сәйкес, қыркүйектің 27-сі күні таңертеңгі сағат 9-да, Төтенше жағдайлар департаментінің кезекші бөліміне Төңкеріс көшесінде орналасқан №14-ші мектеп ғимаратына жарылғыш зат қойылды деген анонимді қоңырау шалынған.
Ақпарат алынысымен, төтенше жағдайды жоюға жедел әрекет ету қызметтерінің 50 адамы мен 14 техникасы шұғыл жөнелтілді.
Жүргізілген арнайы іс-шаралардың барысында жарылғыш зат табылмады.
