Таразда 1 миллионнан аса гүл егіледі
ТАРАЗ. KAZINFORM – Биыл Таразды көгалдандыру жұмыстарына көп көңіл бөлінбек. Қала аумағында 12 мың шаршы метр гүлзарға 1 миллионнан астам гүл егу жоспарланған. Одан бөлек, 15 мың раушан гүлі егіледі.
«15 мың раушан гүлін қаладағы Абай, Төле би, Сейфуллин көшелеріне, Жамбыл даңғылының бойына, саябақ, скверлерге егу жоспарланып отыр. 627 шаршы метр қазандықтарымыз бар. Жасыл желектерді күтіп-баптау мақсатында 22 дана суқұйғыш арнайы автокөліктер жұмылдырылып, қосымша 12 су ұңғымасы орнатылады», – дейді «Жасыл ел-Тараз» ЖШС директорының орынбасары Айдын Бейсеков.
Айта кетейік, гүл егу жұмыстары сәуір айының 15-інен басталады. Бүгінгі таңда дайындық жұмыстары, сондай-ақ бұрын егілген 30 мыңға жуық раушан гүлдерін ашу жұмыстары жүріп жатыр.
