Таразда алты сағаттың ішінде 30 см қар жауды
ТАРАЗ. ҚазАқпарат - Синоптиктердің болжағанындай, бүгін Жамбыл облысының аудандары мен Тараз қаласында қалың қар жауды, деп хабарлайды «ҚазАқпарат» ХАА тілшісі.
Алты сағаттың ішінде түскен қардың биіктігі облыс орталығында 25-30 см жеткен және қардың әлі жаууда.
Жамбыл облыстық ТЖД «Жедел-құтқару жасағы» ММ Жуалы ауданында (Тараздан 60 шақырым қашықтықта) бір тәуліктің ішінде Б.Момышұлы-Қошқар ата тасжолының 35 шақырымында қар құрсауында қалып қойған 6 машинаны шығарып, 11 адамды аудан орталығы - Б.Момышұлы ауылына эвакуациялады.
ҚР ТЖМ дерегіне сүйенсек, бүгін сағат 18:10-нан бастап ауа райының қолайсыздығына байланысты (қалың қар түсуі) республикалық маңызы бар «Алматы-Ташкент» тасжолының 534-593 шақырым аралығындағы Айша бибі ауылынан ОҚО шекарасына дейінгі бөлігінде барлық көлік түрлерінің қозғалысына тыйым салынды.
Қазіргі таңда Таразда ауа температурасы - 10 градус нөлден төмен. Облыс бойынша қалың қар жауып, көктайғақ орын алады деп болжануда. Ауа температурасы түнде -15 -20, кей жерлерде -25-ке дейін жетіп, ал күндіз -8 -13, кейбір бөлігінде -16 градус аяз болады деп күтілуде.
