Таразда балабақша кезегін 92% қысқартқан тәсілді барлық өңірге енгізу ұсынылды

АСТАНА. KAZINFORM – Елімізде жаңа туған сәбилерге ЖСН автоматты түрде беріледі, балабақша кезегі қысқарып, мектепке қабылдаудағы қағазбастылық жойылды. Тіпті студенттерге жатақхана өтінішсіз, проактивті түрде берілетін болды.

Мемлекеттік қызметтерді жетілдіру туралы цифрлық даму, инновациялар және аэроғарыш өнеркәсібі министрі Жаслан Мәдиев айтып берді.

Министр әрбір өмірлік жағдайға проактивті цифрлық шешімдер ұсынылатынын атап өтті.

− Мысалы, бала дүниеге келгенде азаматтар енді құжат рәсімдеуге, еңбекке жарамсыздық парағын алуға немесе жәрдемақы рәсімдеуге уақыт жұмсамайды. Барлығы автоматты түрде смартфон арқылы шешіледі. Астана қаласы мен Ақмола облысында жаңа туған нәрестелерге жеке сәйкестендіру нөмірі автоматты түрде тағайындау сынақтан өтті, − деді министр Үкіметтің бүгінгі отырысында.

Сондай-ақ өткен жылы Тараз қаласында балабақшаға қабылдау кезінде ваучерлік қаржыландыру тетігі сынақтан өткізілді. Нәтижесінде кезек 92%-ға қысқарған. Министр бұл тәсілдерді бүкіл өңірлерге масштабтауды ұсынды.

− Оқу-ағарту министрлігімен бірлесіп, мектепке қабылдаудағы қағазбастылықты толық жойдық. Қосымша «Әлеуметтік әмиян» енгізілді — бұл тегін тамақтандыруды бақылауға, жалған мәліметтерді болдырмауға және бюджет қаражатын тиімді пайдалануға мүмкіндік береді. Бұл жоба елдің барлық мектептеріне енгізіліп жатыр. Сондай-ақ колледждер мен жоғары оқу орындарына түсу процесі цифрландырылды. Басқа қаладан келген студенттерге жатақхана өтінішсіз, автоматты түрде беріледі, − деп түсіндірді Ж. Мәдиев.

Сонымен бірге, елімізде Цифрлық еңбек шартын жасау сервисі іске қосылды. Еңбек және халықты әлеуметтік қорғау министрлігімен бірлесіп, зейнетақы төлемдерін проактивті түрде тағайындайтын ұйымдар тізімі кеңейілуде.

Айта кетейік, өткен жылы Қазақстанда мемлекеттік қызметтің 91% онлайн көрсетілген. «Ұлттық қор – балаларға», «Стоп-кредит», «Көлік иелену тарихы», «Құмар ойындарға қатысудан ерікті түрде бас тарту» секілді танымал сервистер іске қосылған.

Бұған дейін Ж. Мәдиев eGov арқылы кедергі келтірген көлік иелеріне анонимді хабарлама жіберуге болатынын айтқан еді.