Таразда судья екі миллион теңге пара алғаны үшін ұсталды
ТАРАЗ. ҚазАқпарат - Антикоррупциялық қызмет Сот әкімшілігінің қауіпсіздік бөлімімен бірлесіп, жасырын іс-шаралардың нәтижесінде Тараз қаласы №2 соты судьясының 2 млн теңге сомасында пара алғанын әшкереледі, деп хабарлайды ҚазАқпарат.
Судья сотталушыдан іс жүргізуде қылмыстық іс бойынша бас бостандығынан айыруға байланысты емес жаза тағайындағаны үшін ақшалай қаражат алды деп күдектелуде.
«Қылмыстық-процестік кодекстің 550-бабының тәртібімен Қазақстан Республикасының Бас прокуроры сотқа дейінгі тергеп-тексеруді жалғастыруға келісім берді.
Қылмыстық-процестік кодексінің 201-бабына сәйкес өзге ақпарат жария етуге жатпайды», - деп жазды өңірдегі Антикор.
Айта кетейік, бұған дейін талапкерді грантқа түсіріп беремін деп сыйақы алған Тараз тұрғыны ұсталған болатын.
