Таразда тағы бір үйдің кіреберісі карантинге жабылды
ТАРАЗ. ҚазАқпарат – Тараз қаласындағы «Аса» шағын ауданындағы көппәтерлі тұрғын үйдің кіреберісі карантинге жабылды, - деп хабарлайды ҚазАқпарат облыс әкімдігігінің ресми сайтына сілтеме жасап.
Кеше аталған үйде тұратын 1975 жылы туған тұрғыннан коронавирус инфекциясы табылған болатын. Қазір әйел инфекциялық стационарға жатқызылып, қажетті ем-дом шараларын алуда.
Эпидемиологиялық тексеру барысында науқастың Нұр-Сұлтан қаласынан келген жақын туысымен байланыста болғаны анықталды. Онымен жақын қарым-қатынаста болған үш адам карантинге жатқызылды.
Подъезде және тұрғылықты жері бойынша дезинфекциялық өңдеулер жүргізілді. Аталған подъездің пәтерлерінде тұратын 31 тұрғын 14 күнге оқшауланды. Оларға өз пәтерінен шығуға тыйым салынды.
Сондай-ақ, ондағы жұмыс істейтін үш тұрғынға уақытша еңбекке жарамсыздық туралы анықтама берілді. Олармен өзін-өзі оқшаулаудың маңызы туралы түсіндіру жұмыстары жүргізілді. Подъезд маңында полиция қызметкерлері кезекшілік етуде.
Тараз қаласының әкімдігі аталған үйдің карантиндегі тұрғындарын қажетті азық-түлік өнімдерімен қамтамасыз етіп отыр.
