Таразда «Ұлы Дала рухы» фестивалі өтіп жатыр
ТАРАЗ. ҚазАқпарат - Жамбыл облысында үш күндік «Ұлы Дала рухы» фестивалі басталды, деп хабарлайды ҚазАқпарат тілшісі.
Тараздағы Достық үйінде жергілікті және қазақстандық суретшілердің, фототілшілердің шығармашылық туындылары, аймақтық БАҚ стендтері жұртшылық назарына ұсынылды.
«Іс-шараның мақсаты - Елбасының «Рухани жаңғыру» бағдарламалық мақаласында айтылған міндеттер аясында ұлттық салт-дәстүр мен құндылықтардың, ата-бабадан қалған шығармашылық мұраның танымалдығын арттыру. «Ұлы Дала рухы» қатысушыларын қызықты бағдарлама күтіп тұр. Суретші-иллюстраторлардың, жергілікті БАҚ фототілшілерінің сурет және фото көрмесі қызықтырмай қоймайды. Сондай-ақ, концерттік бағдарлама ұйымдастырылған», - дейді облыстық ішкі саясат басқармасының басшысы Берік Уәли.
Фестиваль аясында тараздықтар елордалық суретші Аңсаған Мұстафаның шығармашылығымен таныса алады. Сонымен қатар, «Алашұлы» танымал тобының әншілері концерт қояды.
