Тараздық оқушы «Тәуелсіздік ұрпақтары» жобасы аясында қалқымалы электр стансасын жасап шығарды
АСТАНА. KAZINFORM – Былтырғы «Тәуелсіздік ұрпақтары» жобасының «Ақпараттық технологиялар» бағыты бойынша грант иегері Қанат Тәжіхан «Future Solar Power Plant» жобасын жүзеге асырып, таныстырды. Қанат 18 жаста. Тараз қаласындағы мектептердің бірінде 12-сыныпта оқиды. Болашақта IT инженері болуды жоспарлап отыр. Бұл туралы Мәдениет және ақпарат министрлігінің баспасөз қызметі мәлім етті.
«Студент грант қаражаттына қуаттылығы 6,6 кВт болатын Қазақстандағы тұңғыш қалқымалы күн электр станциясын жасаған. Жүйе күн трекерімен және өзін-өзі тазалау функциясымен жабдықталған», - делінген хабарламада.
Автордың айтуынша, оның өнертабысы қазақстандық нарықтағы ең тиімдісі.
Қанаттың жобасы қазірдің өзінде Алматы облысының экологиялық аймақтарының бірінде жүзеге асырылуда.
Айта кетерлігі, 2024 жылы «Тәуелсіздік ұрпақтары» байқауы аясында жастардың бастамаларын жүзеге асыруға 3 миллион теңге сомасында 30 грант бөлінеді. Волонтерлік саласын қолдау мақсатында қосымша «Волонтерлік» бағыты қарастырылған.
Қазір «Тәуелсіздік ұрпақтары» байқауына өтінімдер қабылданып жатыр.
