Тәртіптік-қадағалау комитетінің шешімімен Премьер-лига мен Бірінші-лиганың турнир кестесіне өзгерістен енгізілді
АЛМАТЫ. Шілденің 27-сі. ҚазАқпарат /Ерлік Ержанұлы/ - Бүгін футболдан Тәртіптік бақылау комитетінің шілденің 16-сындағы шешімі өз күшіне енді,
деп хабарлайды ҚазАқпарат Қазақстан футбол федерациясының интернет сайтына сілтеме жасап.
Тәртіптік бақылау комитетінің шешімімен Премьер-лига мен Бірінші-лиганың турнир кестесіне өзгерістер енгізілді. Олардың шілденің 16-сындағы шешімге қарсы шағым беруге берілген 10 күндік мерзімі кеше аяқталды. Сол себепті комитет шешімін орындамағаны және биылғы жылғы өтініш беру жарнасын төлемегені үшін Премьер-лигада өнер көрсететін "Қазақмыс" пен Бірінші-лигадағы "Түркістан", "Екібастұз" командаларынан 3 ұпайдан кемітілді. Ал комитет шешімін орындамағаны және 2008, 2009 жылғы өтініш беру жарнасын төлемегені үшін Бірінші-лигадағы "Айжарық" футбол клубы 6 ұпайынан айырылды.
Қазір 16 турдың қорытындысы бойынша Премьер-лигадағы 14 команданың арасында "Қазақмыс" 12 ұпаймен 11-ші сатыда тұр. Ал Бірінші-лигадағы 14 команданың арасынан 13 турдың қорытындысы бойынша "Айжарық" 16 ұпаймен - 8-ші, "Екібастұз" 15 ұпаймен - 9-шы, "Түркістан", 7 ұпаймен 13-ші орында келе жатыр. Түркістандықтардың турнир кестесін түйіндеп тұрған "Ақтөбе-Жастан" 2 ұпайы ғана артық.
