Ташкенттегі дәстүрлі өнер көрмесі соңғы сән үлгілерін паш етумен тәмамдалды (ФОТО)

ТАШКЕНТ. ҚазАқпарат - Ташкентте өткен "Hand Made in Uzbekistan" дәстүрлі өнер көрмесінің қорытынды күнінде шараны ұйымдастырушылар оның қонақтары мен қатысушыларын өзбек эстрадасының жұлдыздары қатысқан гала-концертпен және әйелдер мен қыз балалар киімдерінен сән үлгілерін көрсетумен қуантты.

Шара барысында Өзбекстанның озық дизайнерлері халық дәстүрі мен заманауи сән үні үйлесімді ұштасқан киім үлгілері коллекциясын жұртшылық назарына ұсынды.

Әр коллекцияда көрініс тапқан Хорезмнің зергерлік бұйымдары, Бұқараның алтынмен әдіптеп тігу өнері, Самарқандтың сәулет өнерінің белгілері, Қашқадария, Сурхандария және Қарақалпақстанның түрлі де сырлы тігін өнері көңілге қуаныш ұялатады.

Дәстүрлі өнер көрмесінің қорытындысында қазылар алқасы түрлі аталымдар бойынша жеңімпаздарды анықтады.