Тасқын су басқан Құлсарының тұрғындары аудандық әкімдік алдына жиналды
АТЫРАУ. KAZINFORM – Құлсары қаласында тасқын судан зардап шеккен тұрғындар Жылыой аудандық әкімдігінің алдына жиналды.
Атырау облысының жедел штабынан мәлім еткендей, тұрғындар өтемақы төлеу, жаңа баспана беру мәселесін көтерген. Жиналғандармен Жылыой ауданының әкімі Жұмабек Қаражанов кездесті.
«Жылыой ауданында 2 920 үйді су бастқан. Қазір оның 2 906-сы судан тазартылды. Бүгінге дейін тасқын су кірген 2 667 тұрғын үйге техникалық зерделеу, 2 622 тұрғын үйге бағалау жүргізілді. Тұрғындардан 3 мыңға жуық өтініш түсті. Су тасқынынан зардап шеккен 3 904 тұрғынға 100 айлық есептік көрсеткіш мөлшерінде біржолғы төлем берілді», - деп хабарлады облыстық жедел штабтан.
Сондай-ақ 289 кәсіпкерге залалды өтеу бойынша кеңес берілген.
«Бүгін түстен кейін арнайы мамандар әр тұрғынның үйіне барады. Олар тұрғын үйді техникалық зерделеу және бағалау қорытындысымен таныстырады», - деп мәлім етті облыстық жедел штабтан.
Еске сала кетелік, бұған дейін Құлсарыда құрылысы бітпеген 14 үй мен 7 кәсіпкерлік нысан әлі су ортасында тұрғанын хабарлаған едік.
