Тасқын кезеңі басталғаннан бері 265 нысанды су басты - ТЖМ

None
None
НҰР-СҰЛТАН. ҚазАқпарат – Тасқын кезеңі басталғаннан бері еліміз бойынша 265 нысанды су басты, деп хабарлайды ҚазАқпарат ҚР Төтенше жағдайлар министрлігіне сілтеме жасап.

Атап айтқанда, Ақтөбе, Батыс Қазақстан, Павлодар, Қарағанды облыстарында 185 тұрғын үй, 78 саяжай мен 2 әлеуметтік нысанды еріген қар суы басқан. Барлық жердегі су сорғытылды, Ақтөбе облысындағы 15 саяжай ғана бақылауда қалып тұр.

Осы облыстарда 1165 адам эвакуацияланды. Оның 676-сы уақытша пункттерге, 480-і туыстарында орналастырылса, 9-ы үйлеріне оралды.

Қарағанды облысында республикалық маңызы бар автожолдардың 6 учаскесінде, Қарағанды және Ақмола облыстарында облыстық маңызы бар автожолдардың 6 учаскесінде, Батыс Қазақстан, Ақмола, Қарағанды және Қостанай облыстарында жергілікті маңызы бар автожолдардың 18 учаскесінде және Ақтөбе облысында жергілікті маңызы бар автожол учаскесі - бір көпірде су тасып жатыр.

Айта кетейік, бұған дейін ҚР Индустрия және инфрақұрылымдық даму министрі Қайырбек Өскенбаев су басу қаупі бар жолдарды кезекші бригадалар жіті бақылап отырғанын мәлім етті.

ТЖМ ақпараты бойынша, Ақмола, Ақтөбе, Батыс Қазақстан, Шығыс Қазақстан, Павлодар, Түркістан, Қарағанды облыстары және Нұр-Сұлтан қаласында жергілікті атқарушы органдар мен ТЖМ күштері 1368 мың текше метр еріген қар суын сорғытқан. Түркістан облысынан басқаларының аумағында инертті материалдары бар 68112 қап төселген. Сонымен қатар, Батыс Қазақстан облысында 250 шаршы метр өзен алқабында мұз кесілді.

Жұмыстарға ТЖМ, ІІМ, жергілікті атқарушы органдардан, үкіметтік емес ұйымдардан 2402 адам, 798 техника, 350 су айдау және 18 жүзу құралы жұмылдырылды.

Маңғыстау және Атырау облысының құтқарушылары Батыс Қазақстан облысындағы Тасқала ауданы мен Орал қаласында әлі де қызмет көрсетіп жатыр.

5 сәуірде Ақмола облысындағы Жібек Жолы және Қоянды кенттерінде, Шығыс Қазақстан облысы Алтай ауданындағы Зубовск кентінде алдын алу жұмыстары басталды.

Еске салсақ, ҚР Төтенше жағдайлар министрлігі Қазақстанда 340 елді мекенді су басу қаупі жойылғанын айтқан болатын.


Соңғы жаңалықтар