«Тастақ» базары маңындағы өрт жер үйден шыққан - Алматы ТЖД

  АЛМАТЫ. ҚазАқпарат - Алматыдағы «Тастақ» базарының маңындағы жеке тұрғын үйден өрт шықты, деп хабарлайды ҚазАқпарат тілшісі қалалық ТЖД баспасөз қызметіне сілтеме жасап.

Жексенбі күні Тастақ базары маңында болған өрт туралы алғашқы ақпарат Инстаграм әлеуметтік желісіндегі kris_p_almaty парақшасында пайда болды. Кейін бұл ақпаратты қалалық Төтенше жағдайлар департаменті де растады.

ТЖД баспасөз қызметінің жетекшісі Сандуғаш Баймұхамбетованың айтуынша, өрт сөндірушілер тілсіз жаумен 1 сағатқа жуық арпалысқан.

«18 ақпан күні таңғы 07:29-да «101» пультіне Гайдар көшесі, 107-үйде өрт шыққаны туралы ақпарат келіп түсті. Өрт сөндірушілер 8 минуттан соң - 07:37-де оқиға орнына жетті. Жеке тұрғын үйдің ауласындағы екі қабатты ғимараттың екінші қабаты мен шатыры жалындап жатты. Тілсіз жау 08:08-де ауыздықталып, 08:31-де толығымен сөндірілді. Жалын 290 шаршы метр аумақты шарпыды. Жапа шеккендер мен қаза болғандар жоқ», - деді ол.

Жалынмен күреске Алматы ТЖД қызметінің 14 техникасы мен 44 өрт сөндірушісі жұмылдырылды.