Тау-кен құтқару қызметі жеке меншіктен министрлікке қайтарылуы мүмкін – министр
АСТАНА. KAZINFORM – Төтенше жағдайлар министрі Шыңғыс Әрінов орталық коммуникациялар қызметінде өткен брифингіде тау-кен құтқару қызметін жеке меншіктен министрлікке қайтаруғак ниетті екенін айтты.
«Тау-кен құтқарушылары салаға жеке меншік компания дұрыс қаржы бөлмейтінін айтып шағымданғанын естіген шығарсыз. Осы қызметті ТЖМ құрамына қайтаруға қалай қарайсыз?» - деп сұрады журналист.
Шыңғыс Әрінов құтқару қызметтері түріне қарамастан бір ведомство құрамында болу керек деп ойлайтынын айтты.
«Бұл мәселеге байланысты менің жеке пікіріме келсек, министрліктегі жағдайды зерделедім. Менің топшылауымша, бүкіл құтқару қызметтер бір ведомствоға біріктірілуі керек екеніне сенімдімін. Яғни, бытыраңқылық болмайды. Қызметтер бір-бірін қайталамауы керек. Ол қызметтерді тиімсіз қолдануға да жол берілмейді. Мен бұл мәселені түбіне дейін зерделеу туралы тапсырма бердім. Соның қорытындысы бойынша оңтайландыру шаралары қабылдайтын шығармыз. Құтқару қызметтерінің сұлбасын дұрыс ойластырсақ, бұл бізге қатердің бәріне жедел ден қоюға мүмкіндік береді. Яғни, тау-кен құтқару қызметін министрлікке қайтару бағытында қадам жасаймыз», - деді министр.
