Тәуелсіздіктің 25 жылдығына орай бірқатар қызметкерлер марапатталды - Алматы облысы

ТАЛДЫҚОРҒАН.ҚазАқпарат - Алматы облысының Сарқан ауданындағы Екіаша ауылдық округінің мəдениет үйінде Қазақстан Республикасы Тәуелсіздігінің 25 жылдығына арналған салтанатты шара өтті. Кеште аудан əкімі тұрғындарды Мерейлі мерекемен құттықтап, 25 жылда елді мекеннің əлеуметтік-экономикалық дамуына үлес қосқан бірқатар жандарға "ауданның құрметті азаматы" атағын берді. Олардың қатарында, ауданның экономикалық және әлеуметтік салаларын дамытуға сіңірген еңбегі үшін Өмірəлиев Талғат Əбенұлы, денсаулық сақтау ісіне сіңірген айрықша еңбегі мен қоғамдық жұмысқа белсенді ат салысқаны үшін Тілемісов Түйебай, Сарқан ауданның ауыл шарашылығы саласына сіңірген айрықша еңбегі мен қоғамдық жұмысқа белсене ат салысқаны үшін Душкин Сергей Николаевич бар.

Сондай-ақ түрлі саланың қызметкерлерін құрмет грамотасы жəне алғыс хаттармен марапаттады.

Шара соңы концертке ұласты. Кешке Қазақстан Республикасының Мәдениет және спорт министрлігі Тілдерді дамыту және қоғамдық-саяси жұмыс комитеті төрағасының орынбасары Мелдешов Ғалымжан Сәрсенбайұлы арнайы қатысты.