Тәжікстанның арнайы қызметтері би кешіндегі жарылысты лаңкестік әрекет деп санайды

АСТАНА. Қыркүйектің 6-сы. ҚазАқпарат - Тәжікстанның Ұлттық қауіпсіздік комитеті бүгін түнде Душанбеде би кешінде болған жарылысты лаңкестік әрекет деп қарастырып отыр. Бұл туралы ИТАР-ТАСС агенттігі тәжіктің арнайы қызметтеріне сілтеме жасап хабарлап отыр.

Шағын қуатты түтінсіз құрылғының жарылуы салдарынан, соңғы мәліметтер бойынша, жеті адам зардап шеккен, олардың екеуінің жағдайы - өте ауыр. Оқиғаның ісі суымай, екі күдікті ұсталып отыр. Кейбір деректер бойынша, жарылысты мұсылмандардың ораза айы кезінде жұмыс істеп жатқан ойын-сауық мекемелеріне наразылық білдіруші жас діни фанатиктердің ұйымдастыруы ықтимал.

Сарапшылар, халықтың 98 пайызы исламды уағыздайтын тәжік қоғамында соңғы уақытта ораза кезінде ойын-сауық мекемелерін жауып, спирттік ішімдіктер сатуға тыйым салу туралы үндеулердің жиі айтылып жатқанына назар аударып отыр.