Техаста атыс болып, үш адам мерт болды
ОСТИН. ҚазАқпарат – Техас штатының Форт-Уэрте қаласында болған атыс салдарынан үш адам қаза тауып, сегізі жарақат алды, деп хабарлайды ҚазАқпарат Reuters-ке сілтеме жасап.
Атыс 4 шілде – АҚШ тәуелсіздігі күнін тойлау кезінде түн ортасында автотұрақта болды, деді полиция сейсенбі күні.
Зардап шеккендердің бірі сол жерде қаза тапты. Екеуі ауруханада көз жұмса, 8 адам ауруханаға жеткізілді.
ABC News дерегінше, зардап шеккен тұрғындардың 10-ы ересек адамдар, біреуі – кәмелет жасына толмаған бала.
Оқиға Тәуелсіздік күніне орай жыл сайын өткізілетін жергілікті ComoFest фестивалі аяқталған соң бірнеше сағаттан кейін Комо Форт-Уэрт ауданында болды.
Әзірге қанша адам оқ атқаны және неліктен оған барғаны белгісіз. Тұтқынға алынғандар туралы мәлімет таратылмады.
