Технологияларды пайдаланушыдан оларды жасаушыға айналу: Қазақстанның әлемдік БАҚ назарындағы әлеуеті

Higgsfield жасанды интеллект көмегімен бейнежазба жасауға арналған құралдар әзірлейді. Компанияның мәліметінше, платформада тіркелген пайдаланушылар саны 40 миллионнан асқан. Жобаның Қазақстанмен де тікелей байланысы бар. Елімізде оның өнімдерін әзірлеуге және дамытуға қатысатын 300-ден астам маман жұмыс істейді.

Басылым бұл жобаны қазақстандық мамандардың халықаралық нарыққа арналған технологияларды жасауға қатыса алатынын көрсететін мысалдардың бірі ретінде қарастырады.

Higgsfield әлемдік инвесторлардың назарын қалай аударды?

Higgsfield халықаралық нарықтағы қызметін кеңейту үшін инвестиция тартып келеді.

2026 жылдың тамызында компания Series B инвестициялық кезеңінде 400 миллион доллар қаржы тартты. Сол кезде стартап 5,4 миллиард долларға бағаланды.

Қазан айында компания осы инвестициялық кезеңді кеңейтіп, NVIDIA технологиялық компаниясы мен TCV инвестициялық қорынан қосымша қаржы тартқанын хабарлады.

Ірі инвесторлардың бұл жобаға қаржы салуы жасанды интеллект арқылы бейнежазба жасау және өңдеу технологияларына қызығушылықтың артып келе жатқанын көрсетеді.

Қазақстан мұндай жобалардан қандай пайда көре алады?

Higgsfield сияқты жобалардың ел экономикасына әкелетін пайдасы тартылған инвестиция көлемімен ғана өлшенбейді.

Ең алдымен, мұндай компаниялардың Қазақстанда қанша маманды жұмыспен қамтитыны, жаңа технологияларды қайда әзірлейтіні және мамандардың кәсіби дамуына қандай мүмкіндік беретіні маңызды. Сондай-ақ жасалған өнімдерге зияткерлік меншік құқықтарының кімге тиесілі екені де назардан тыс қалмауы керек.

Бұл бағыт Президент Қасым-Жомарт Тоқаевтың Қазақстан халқына Жолдауында айқындалған міндеттермен сабақтас. Мемлекет басшысы жасанды интеллектіні іс жүзінде қолдануға, еңбек өнімділігін арттыруға және жоғары технологиялық салаларды дамытуға басымдық берген болатын.

Мұндағы мақсат — жаңа технологияларды пайдалану арқылы қосылған құны жоғары өнімдер шығаруға жағдай жасау.

Осы тұрғыдан алғанда, технологиялық компанияларға тартылған инвестициямен қатар, олардың Қазақстанда қандай мүмкіндіктер қалыптастыратыны да маңызды. Атап айтқанда, білікті мамандар даярлау, жаңа жұмыс орындарын ашу, ғылыми зерттеулер жүргізу және халықаралық нарықта сұранысқа ие өнімдер әзірлеу мәселелері алдыңғы орынға шығады.

Қазақстанның цифрлық секторы қалай дамып жатыр?

Higgsfield жобасының дамуы Қазақстанның технологиялық саласындағы өзгерістермен қатар жүріп жатыр.Халықаралық тәжірибеде нарықтық құны 1 миллиард доллардан асатын стартаптар «сыңармүйіз» (unicorn) деп аталады. Higgsfield те осындай компаниялардың қатарына кіреді. Дегенмен компанияның жоғары бағалануы оның ел экономикасына дәл сондай көлемде пайда әкелетінін білдірмейді.

Экономикалық нәтиже Қазақстанда қанша маман жұмыс істейтініне, негізгі технологиялардың қайда әзірленетініне, экспорттан қанша табыс түсетініне және зияткерлік меншік құқықтарының елде сақталуына байланысты.

Соңғы жылдары Қазақстанның цифрлық секторында да айтарлықтай өсім байқалады. Мәселен, елімізде ғылыми-зерттеу және тәжірибелік-конструкторлық жұмыстарға жұмсалған ішкі шығындар 2018 жылғы 72,2 миллиард теңгеден 2025 жылы 261,5 миллиард теңгеге жеткен.
Ал IT-қызметтер экспорты 2020 жылғы 33,5 миллион доллардан 2025 жылы 1,142 миллиард долларға дейін ұлғайған. Бұл сандар Higgsfield компаниясының қаржылық нәтижелерін емес, Қазақстанның жалпы цифрлық секторының даму көрсеткіштерін сипаттайды.

Басылым авторлары мұндай өсім ел экономикасында цифрлық технологиялардың маңызы артып келе жатқанын көрсететінін атап өтеді.
Ендігі міндет — қазақстандық мамандар қатысатын технологиялық компаниялардың халықаралық жетістіктері ел экономикасына ұзақ мерзімді пайда әкелуі үшін жағдай жасау. Бұл ретте білікті мамандар даярлау, отандық технологияларды қолдау, жаңа жұмыс орындарын ашу және цифрлық қызметтер экспортын кеңейту маңызды.

Айта кетейік, бұған дейін Қазақстанның Еуропадағы жасанды интеллект инфрақұрылымының маңызды орталығына айналу мүмкіндігі туралы жазған едік.