Текеліде зардап шеккен отбасыларға пәтер кілттері табыс етілді

ТАЛДЫҚОРҒАН. Қыркүйектің 4-і.  ҚазАқпарат /Сандуғаш Дүйсенова/ -   Алматы  облысы әкімінің    бірінші орынбасары  Амандық  Баталов   маусымның  13-інде   болған    жер сілкінісінен  кейін  қалпына келтірілген  Текелі   қаласында жұмыс сапарымен болды.

Амандық  Баталов    №1 орта мектепті  аралап көрді.     1948  жылы  салынған   бұл ғимаратты сейсмикалық  нығайтуға  және  күрделі жөндеуге     облыстық  бюджеттен    180  миллион теңге бөлінді.   «Жөндеу-Құрылыс» ЖШС-нің    200-ден астам құрылысшысы  маусымның  28-і мен     тамыздың   25-і аралығында     мектепті  қалпына келтіру  жұмыстарымен  айналысты. 

Одан кейін Амандық  Баталов   Спорт  сарайында   болды.   «Шымыр» ЖШС    жөндеу  жұмыстарын  жүргізген     ол нысан  алғашқылардың  қатарында  Қарттар  мен  мүгедектерге арналған  интернат-үйімен бірге     пайдалануға берілген.

Әкімнің    орынбасары  сондай-ақ, Текелідегі  үйлері апатты жағдайда  болған    зардап шеккен  отбасыларға пәтер кілттерін табыс   етті.  Тамыз  айының    аяғында   56  отбасы     қалалық әкімдік берген    тұрғын   үйлерге кіріп, ал   16 отбасы        қыркүйектің   алғашқы күндері  Қазақстандық   және  Коринская  көшелеріндегі көпқабатты  тұрғын үйлерден  жаңа баспана алған  болатын.