Теннис: Бублик пен Кукушкин Роттердам турнирінде ойнайды
Қазақстанның бірінші, әлемнің 54-ракеткасы А.Бублик рейтингісі жоғары болғандықтан, негізгі жарысқа бірден ілікті.
Рейтингте 68-орында тұрған М.Кукушкинге іріктеу сайысына қатысуға тура келді. Ол бүгін әлемнің 131-ракеткасы, германиялық Янник Маденмен кездесті.
Бірінші партияда қазақстандық теннисші айқын басымдылық көрсетті - 6:1.
Екінші сетте Я.Маден 3:0 есебімен алға шықты. Дегенмен М.Кукушкин таразы басын теңестіре алды. Ақыры тай-брейкті жеңіспен тәмамдады - 7:6 (7:4).
Бәсеке сағат жарымға созылды.
А.Бублик пен М.Кукушкиннің қарсыластары кейін анықталады.
Жүлде қоры 2,1 млн астам еуроға бағаланған Роттердам жарысы 10-16 ақпан аралығында өтеді.
Еске сала кетейік, бұдан бұрын Федерация кубогының іріктеу кезеңінде Қазақстанның Бельгиядан жеңіліп қалғанын жазған болатынбыз.