Теннис: Елена Рыбакина Цинциннати турнирінде жеңіліп қалды

НҰР-СҰЛТАН. ҚазАқпарат – Қазақстанның бірінші, әлемнің 17-ракеткасы Елена Рыбакина Цинциннати (АҚШ) турнирінің екінші айналымына шыға алмады, деп хабарлайды ҚазАқпарат тілшісі.

Е.Рыбакина Нью-Йоркта өтіп жатқан, жүлде қоры 2,2 млн АҚШ долларынан асатын ірі жарыстың алғашқы айналымында рейтингте 27-орында тұрған ресейлік Екатерина Александровамен кездесті.

Қарсыластардың бұған дейін бір-ақ рет жолдары тоқайласып, жыл басында Шэньчжэнь WTA турнирінің финалында қазақстандық теннисші 2:6, 4:6 есебімен жеңіліп қалған еді. Ол кезде Е.Рыбакина рейтингте 36-орында болса, Е.Александрова одан екі саты жоғары еді.

Дегенмен Е.Рыбакина одан кейінгі додаларды сәтті өткізіп, рейтингте 17-орынға көтеріліп, қазақстандық рекорд жасаған еді. Алайда наурыз айында коронавирус індетіне байланысты жарыстар тоқтап, Елена да қарқынынан айырылып қалды.

Осы үзілістен кейін Ресейдің бірінші ракеткасы Е.Александрова бұған дейін Палермо мен Прагада кортқа шығып үлгерсе, Цинциннати алты айдай уақыт ойнамаған қазақстандық спортшы үшін алғашқы жарыс еді.

Е.Рыбакина 21 жаста болса, тәжірибесі молырақ Е.Александрова биыл 26-ға толады, ол әрі хард төсенішінде ойнауды жақсы көреді.

Бірінші сетте есеп 2:3 болған мезетте доп берген Е.Рыбакина қателік жіберіп, қарсыласының алға шығуына жол беріп қойды. Е.Александрова сетке доп бергенде, қазақстандық теннисші қайыра брейк жасап, есепті қысқартты – 4:5. Бірақ ресейлік спортшы сетті тағы бір брейкпен түйіндей білді – 7:5.

Екінші сет әлдеқайда тартысты өрбіп, мәселе тай-брейкте шешілді. Онда Е.Рыбакина сетболды пайдалана алмады. Ал қарсыласы мүмкіндігін мүлт жіберген жоқ – 7:6 (8:6).

Бәсеке 1 сағат 38 минутқа созылды.

Осылайша қазақстандық теннисші қарымта қайтара алмады. Дегенмен 31 тамызда басталатын АҚШ-тың ашық чемпионатында табысты өнер көрсетсе, рейтингіде көтерілері анық.

Е.Александрова екінші айналымда әлемнің 51-ракеткасы, Польша өкілі Ига Свентек немесе рейтингте 90-орында тұрған америкалық Кристина Макхэйлдің біреуімен шеберлік байқасады.

Цинциннати турнирінде жекелей сында Қазақстаннан сондай-ақ Юлия Путинцева мен Александр Бублик сынға түседі.

Еске сала кетейік, бұдан бұрын Зарина Дияс пен Михаил Кукушкиннің Цинциннати турнирінің іріктеу сатысында жеңіліп қалғанын жазған болатынбыз.