Теннис: Голубев жұптық сында Доха турнирінің финалына өте алмады

НҰР-СҰЛТАН. ҚазАқпарат – Қазақстандық Андрей Голубев жұптық сында Доха ATP 250 турнирінің финалына өте алмады, деп хабарлайды ҚазАқпарат тілшісі.

Қазақстандық теннисші франциялық Фабрис Мартенмен бірге жартылай финалда осы доданың 3-ракеткалары, нидерландылық Уэс Колхоф – ұлыбританиялық Нил Скупскимен шеберлік байқасты.

Бірінші партияда нидерландылық-ұлыбританиялық жұп басымдылық танытты – 6:4.

Екінші сетте А.Голубев пен Ф.Мартен 2:0 есебімен алға шыққанымен, сол мүмкіндіктерін пайдалана алмады. Ақыры тай-брейкте У.Колхоф пен Н.Скупскидің асығы алшысынан түсті – 7:6 (7:3).

Бір сағат 45 минутқа созылған тартысты бәсеке барысында қазақстандық-франциялық жұп 3 эйс жасап, 8 брейк-пойнттың біреуін ғана пайдалана алды. Қарсыластары 3 эйс, 2 брейкке (13 брейк-пойнт) қол жеткізді.

Осылайша А.Голубев жұптық сында жүлде қоры 1 млн АҚШ долларынан асатын жарыстың финалына шыға алмай қалды.

Еске сала кетейік, бұдан бұрын А.Голубевтің жұптық сында Доха турнирінің жартылай финалына шыққанын жазған болатынбыз.