Теннис: Қазақстан - Үндістан матчында есеп теңесті
АСТАНА. ҚазАқпарат - Нью-Дели қаласында Федерация кубогы үшін өтіп жатқан бәсекеде қазақстандық Юлия Путинцева үндістандық Анкита Райнамен күш сынасты, деп хабарлайды «ҚазАқпарат» тілшісі.
Бұдан бұрын Қазақстанның бірінші ракеткасы болған Ю.Путинцева осы апта басында жаңартылған дүниежүзілік рейтингте 81-інші сатыға сырғып кетсе, үндістандық теннисші 253-інші орында келеді. Мұндай айырмашылыққа қарамастан, матч тартысты өрбіді.
Бірінші таймда А.Райна 6:3 есебімен басым түсті. Екінші партияны Юлия 6:1 есебімен бет қаратпай ұтты.
Үшінші, шешуші партияда қазақстандық теннисші 3:1 есебімен алға шыққанымен, сол басымдылықты сақтай алмады. Үш геймді қатарынан ұтқан корт иесі есепті 4:3-ке жеткізді. Бұдан соң да оның брейк жасайтындай мүмкіндігі болды. Дегенмен, Ю.Путинцева таразы басын теңестіре алды. Әйтсе де есеп 5:4 болып тұрған кезде үндістандық спортшы бірінші матчболын сәтті пайдалана білді. Осылайша, ол 6:4 есебіен жеңіске жетті. Тартысты ойын 2 сағат 26 минутқа созылды.
Сөйтіп Үндістан - Қазақстан матчында есеп теңесті: 1:1.
Еске сала кетейік, бүгін Үндістанмен алғашқы кездесуде Қазақстанның бірінші, әлемнің 55-інші ракеткасы Зарина Дияс Карман Каур Тхандиді 6:3, 6:2 есебімен жеңген болатын.
Енді жұптық кездесуде Қазақстаннан Гөзал Айнитдинова мен Жібек Құламбаева, Үндістаннан Анкита Райна мен Пратхана Тхомбаре кортқа шығады. Осы бәсекеде ұтқан теннисшілер өз еліне жеңіс әпереді.
