Теннис: Кукушкин Дубай турнирінің алғашқы айналымынан аса алмады

АСТАНА. ҚазАқпарат - Қазақстанның бірінші, әлемнің 88-інші ракеткасы Михаил Кукушкин Дубай турнирінің бірінші айналымында грекиялық Стефанос Циципаспен кездесті, деп хабарлайды «ҚазАқпарат» тілшісі.

Дүниежүзілік рейтингте М.Кукушкиннен алты саты жоғары тұрған, жиырма жасқа биыл толатын грекиялық теннисші бірінші партияда 6:2 есебімен басымдылық көрсетті.
Екінші партия әлдеқайда тартысты болып, тай-брейкке дейін жетті. Бұл сында М.Кукушкин табандылық танытып, 7:6 (7:5) есебімен қарымта қайырды.
Үшінші, шешуші партияда есеп 3:3 болғаннан кейін С.Циципас екі мәрте брейк жасап, жеңіске жетті. Есеп - 6:3.
Осылайша 2 сағат 15 минутқа созылған кездесуде тәжірибелі М.Кукушкин өзінен он бір жастай кіші теннисшіден жеңіліп қалды.
Жүлде қоры 2,6 млн АҚШ долларынан асатын Дубай турнирі 3 наурыз күні мәреге жетіп, жеңімпаз анықталады.
Еске сала кетейік, тағы бір қазақстандық теннисші, әлемнің 142-інші ракеткасы Александр Бублик Акапулько қаласында өтіп жатқан Мексика ашық чемпионатының негізгі турниріне өткен болатын. Ол алғашқы айналымда дүниежүзілік рейтингте 199-ыншы сатыда тұрған австралиялық Танаси Коккинакиспен күш сынасады.