Теннис: Кукушкин Уимблдон турнирінің екінші айналымына шықты
Қазақстандық теннисші алғашқы айналымда дүниежүзілік рейтингте 78-сатыда тұрған испаниялық Пабло Андухармен кездесті.
Бірінші партияда Михаил Кукушкин брейкпен алға шықты - 4:2. Осы басымдылығын сақтай білді - 6:3.
Екінші сетте де М.Кукушкин қарқынын бәсеңдеткен жоқ - 6:2.
Үшінші партияда қазақстандық спортшы брейкпен қоса өз геймдерін де алды - 3:1. Ақыры ол матчты жеңіспен тәмамдады - 6:4.
Бәсеке 2 сағатқа жуық уақытқа созылды.
М.Кукушкин екінші айналымда әлемнің 12-ракеткасы, америкалық Джон Изнер немесе рейтингте 62-сатыдағы норвегиялық Каспер Руудтың бірімен шеберлік байқасады.
Тағы бір қазақстандық, әлемнің 82-ракеткасы Александр Бублик рейтингте 116-сатыдағы франциялық Грегуар Баррермен кортқа шықты.
А.Бублик бірінші партияны жеңіспен бастады - 6:3. Алайда қалған сеттерде 4:6, 3:6, 3:6 есебімен қарсыласына есе жіберіп, жарыс жолынан шығып қалды.
Осылайша Уимблдон турнирінде жекелей сында Қазақстаннан М.Кукушкин мен Ю.Путинцева қалды.
Еске сала кетейік, бұдан бұрын Юлия Путинцеваның Уимблдонда әлемнің 2-ракеткасын ұтқанын, ал 15 жасар қыздың осы турнирдің бес мәрте чемпионын жеңгенін жазған болатынбыз.