Теннис: Кукушкин Вена турнирінің ширек финалына шықты
АСТАНА. ҚазАқпарат - Қазақстанның бірінші, әлемнің 71-інші ракеткасы Михаил Кукушкин Вена турнирінің ширек финалына шықты, деп хабарлайды ҚазАқпарат тілшісі.
М.Кукушкин жүлде қоры 2 млн АҚШ долларынан асатын аталмыш жарыстың екінші айналымында рейтингте 76-ыншы орындағы ресейлік Андрей Рублевпен кездесті.
Біршама тартысты өткен матчта қазақстандық теннисші 7:6 (7:4), 6:4 есебімен ұтты.
Бәсеке 1 сағат 47 минутқа созылды. М.Кукушкин 4 брейк-пойнттың үшеуін пайдалана білсе, А.Рублев бұған қос брейкпен ғана жауап қайырды.
Қазақстандық спортшы ресейлік қарсыласын осы турнирдің іріктеу сайысында да жеңген болатын. Кейін А.Рублев лаки-лузер ретінде негізгі жарысқа қайта қосылған-ды.
Михаил Кукушкин жартылай финалға шығу үшін әлемнің 40-ыншы ракеткасы, венгриялық Мартон Фучовичпен таласады.
Еске сала кетейік, бұдан бұрын М.Кукушкиннің әлемнің 10-ыншы ракетасы, болгариялық Григор Димитровтың меселін қайырғанын жазған болатынбыз.
Вена турнирі 28 қазан күні мәреге жетіп, жеңімпаз анықталады.
