Теннис: З.Дияс үшінші айналымнан аса алмады

ОРАЛ. ҚазАқпарат - Теннистен АҚШ-тың ашық чемпионатында қазақстандық Зарина Дияс үшінші айналымда ресейлік Екатерина Макаровамен кездесті.

Бұл жолы З.Диястан әлдеқайда тәжірибелі, жиырма алты жасар Е.Макарова 6:2, 6:4 есебімен жеңіске жетті.

Сөйтіп қазақстандық теннисшілер арасында жекелей сында жалғыз өзі үшінші айналымға жеткен З.Дияс одан әрі аса алмады. Дегенмен осының өзін табыс деп есептеуге болады. Бұған дейін Австралияның ашық чемпионатында үшінші, Уимблдонда төртінші айналымға дейін жеткен Зарина үшін 2014 жыл, жалпы алғанда, сәтті болды. Қазіргі кезде әлемдік рейтингте Зарина 48-інші орында тұрса, алдағы аптада бұдан жоғарылары анық. Оның небәрі жиырма жаста екендігін ескерсек, осы бетінен қайтпаса, болашақта бұдан да биік асуларға шығатынына сенуге болады.