Теннис: Зарина Дияс Осаканың негізгі турниріне жолдама алды
Әлемнің 80-ракеткасы З.Дияс іріктеу сайыстарының финалында дүниежүзілік рейтингте 327-орында тұрған жапониялық Киока Окамурамен кездесті.
Бірінші партияда брейк жасаған қазақстандық теннисші 3:1 есебімен алға кетті. Тағы бір брейк – 5:1. Сосын өзі доп бергенде, мүмкіндігін жіберген жоқ – 6:1.
Екінші сетте де Зарина өз геймдерін ала отырып, брейкпен алға шықты – 3:1. Тағы бір брейк жасап, тартысты болған алтыншы геймде қарсыласының есепті қысқартуына мүмкіндік бермеді – 5:1. Ақыры матчқа доп бергенде, босаңсыған жоқ – 6:2.
Бәсеке 1 сағат 15 минутқа созылды.
Заринаның негізгі турнирдегі қарсыласы кейін анықталады.
З.Дияс бұған дейін Хиросима додасына қатысқан болатын. Онда Заринаның жолын кескен жапониялық Нао Хибино бүгін осы турнирдің чемпионы атанды.
Жүлде қоры 823 мың АҚШ долларына бағаланған, 16-22 қыркүйек аралығында өтетін Осака турнирінде Қазақстанның бірінші, әлемнің 36-ракеткасы Юлия Путинцева да бақ сынайды. Ол бастапқы бәсекесін әлемнің 23-ракеткасы, хорватиялық Петра Мартичпен өткізеді. П.Мартич Қытайдағы Чжэнчжоу турнирінің финалында бүгін чехиялық Каролина Плишковамен бас жүлдені сарапқа салады.
Осака додасына осы жарыстың өткен жылғы финалисі (онда Каролина Плишковаға есе жіберген болатын), жапониялық Наоми Осака бастаған мықты теннисшілер қатысады. Өткен жылы З.Дияс чехиялық Барбора Стрыцовадан жеңіліп, бірінші айналымнан аса алмаған еді.
Еске сала кетейік, бұдан бұрын Зарина Диястың Осака турнирінің іріктеу сайысын сәтті бастағанын, Елена Рыбакинаның Наньчан додасының финалына шыққанын, сондай-ақ Андрей Голубев пен Александр Недовесовтің жұптық сында Ыстанбұл жарысының жеңімпазы атанғанын жазған болатынбыз.