Теннисші Александр Бублик Истбурн турнирінің іріктеу сайысын жеңіспен бастады
Әлемнің 85-ракеткасы А.Бублик рейтингте 239-орында тұрған канадалық Стивен Диаспен күш сынасты. Іріктеу сайыстарының 4-ракеткасы болып тіркелген қазақстандық теннисші бірінші партияда 4:6 есебімен есе жіберді. Есесіне екінші сетте қарсыласына бірде-бір гейм берген жоқ - 6:0. Үшінші, шешуші партияда А.Бублик матчты жеңіспен аяқтай білді - 6:3.
Бәсеке 1 сағат 28 минутқа созылды.
А.Бублик іріктеу сайыстарының финалында әлемнің 91-ракеткасы, америкалық Теннис Сандгренмен кортқа шығады. Оны ұтса, негізгі турнирге жолдама алады.
Әйелдер арасында қазақстандық Галина Воскобоева латвиялық Елена Остапенкомен бірге жұптық сында Бирмингем турнирінің финалына өте алмады. Қазақстандық-латвиялық жұп жартылай финалда тайбэйлік Се Шувэй мен чехиялық Барбора Стрыцовадан 0:6, 3:6 есебімен ұтылып қалды.
Еске сала кетейік, бұдан бұрын Зарина Диястың Истбурнның негізгі турниріне, Юлия Путинцеваның Бирмингемде жартылай финалға өте алмағанын жазған болатынбыз.