Теннистен әлем чемпионатына жолдама алу үшін барымызды саламыз – Сергей Квак

АСТАНА. ҚазАқпарат – 1-13 мамыр аралығында Шымкент қаласында алғаш рет Asia/Oceania Final Qualifying Juniors Davis Cup және Juniors Billie Jean King Cup іріктеу сайыстары өтеді. Оған 16 жасқа дейінгілер арасында Азия – Тынық мұхит аймағының үздік теннисшілері қатысады. Қазақстан жасөспірімдер құрамасының капитаны Сергей Квак ҚазАқпарат тілшісіне алдағы жарысқа дайындық жөнінде айтып берді.

- Сергей, Juniors Davis Cup іріктеу сайысының басталуына бір аптадан астам уақыт қалды. Команданың әзірлік деңгейі қалай?

- Қазақстандық жасөспірімдер осы аптаның аяғында Шымкентте бас қосады. Бәрінің де көңіл-күйі жақсы. Өзім және Team Kazakhstan академиясының директоры Тимур Аққазиев олармен үнемі байланыстамыз.

- Біздің құрама алдындағы мақсат-міндет қандай?

- Басты міндет – әлем чемпионатына жолдама алу. Өз жерімізде жақсы ойын өрнегін көрсетіп, жеңіс үшін бар күш-жігерімізді салатынымыз анық.

- Өткен жылы 14 жасқа дейінгілер арасында әлем чемпионатында құрама капитаны болдыңыз. Дүниежүзілік додада Қазақстан тұңғыш рет төртінші орынға табан тіреді. 16 жасқа дейінгілер арасында Қазақстан жасөспірімдер құрамасы осы жетістікті қайталай немесе одан асып түсе ала ма?

- Бәрін де жарыс көрсетеді. Өткен жылы қазақстандық жасөспірімдер үздік нәтижеге қол жеткізді. Бұл – бәріміз үшін басты меже. Біздің команда мықты, нәтижені жақсарту үшін барлық мүмкіндік бар.

- Иә, биыл құрам мықты. Заңғар Нұрланұлы мен Әмір Омархановтан үлкен үміт күтеміз. Құраманың үшінші ойыншысы қашан анықталады?

- Бұйырса, 2 мамыр күні белгілі болады. Үшінші ойыншы ретінде Дамир Жалғасбай, Артем Сидоров, Ерасыл Бақтиярдың ішінен біреуі таңдалып алынады.

- Әмір мен Заңғардың бабы қандай?

- Әмір Омарханов ақпанда Қарағандыда ITF J60 додасының жеңімпазы атанды. Наурызда Германияда J100 турнирінде ширек финалға дейін жетті. Ол жеке бапкері Петр Владимирович Нестеровтің үнемі бақылауында. Әмірдің беталысы жақсы, қазіргі таңда өз шеберлігін арттыра түсетіндей мүмкіндіктері бар.

Заңғар Нұрланұлы да биыл ITF жарысында жеңіске жетті. Словакияда қаңтарда J60 турнирінде үздік шықты. Ол Аустрия, Мажарстан және Словакия елдеріндегі беделді додаларда рейтингілік ұпайларға ие болып келеді.

- Шымкентте алғаш болып біздің қыздар Juniors Billie Jean King іріктеу сайысында бақ сынайды. Ярослава Шведованың шәкірттеріне не тілер едіңіз?

- Ең бастысы, әрине, табыс тілеймін. Олар өздерінің үздік өнерін көрсетеді деп сенемін. Біз өз тарапымыздан қолдауға дайынбыз. Алға, Қазақстан!

- Әңгімеңізге рахмет. Қазақстан жасөспірімдеріне жеңіс тілейміз.

Еске сала кетейік, бұдан бұрын Қазақстанда алғаш рет теннистен әлем чемпионатының іріктеу сайыстары өтетінін жазған болатынбыз.

Әлем чемпионатына жолдама үшін қыздар арасында Қазақстан, Аустралия, Тайбэй, Гонконг, Үндістан, Индонезия, Малайзия, Иран, Жапония, Оңтүстік Корея, Қырғызстан, Моңғолия, Жаңа Зеландия, Таиланд, Өзбекстан, Вьетнам құрамалары таласады

Бозбалалар арасында Қазақстан, Аустралия, Малайзия, Пәкстан, Сингапур, Тайбэй, Гонконг, Үндістан, Индонезия, Иран, Жапония, Оңтүстік Корея, Жаңа Зеландия, Таиланд, Өзбекстан, Вьетнам командалары кортқа шығады.

Қазақстан намысын мына спортшылар қорғайды:

Бозбалалар:

1. Әмір Омарханов (Қарағанды)

2. Заңғар Нұрланұлы (Түркістан).

Үшінші бос орынға Дамир Жалғасбай (Алматы), Бақтияр Ерасыл (Астана) және Артем Сидоров (Алматы) таласады.

Қыздар:

1. Іңкәр Дүйсебай (Алматы)

2. Полина Слепцова (Алматы)

3. Ариана Гогулина (Астана)

4. Анастасия Крымкова (Тараз).

Осылардың ішінен команда капитаны Ярослава Шведова үшеуін таңдайды.

Шымкенттегі іріктеу додасында 16 команда төрт топқа бөлінеді. Әр топтан екі үздік құрама плей-офф кезеңіне шығып, әлем чемпионатының жолдамасын сарапқа салады. Азия – Тынық мұхит аймағынан бозбалалар арасында әлем чемпионатына төрт жолдама беріледі, яғни жартылай финалға шыққан командалар әлем біріншілігіне жолдама алады. Қыздар арасында үш жолдамаға үздік үштікке енгендер ие болады.

Шымкентпен қатар, Еуропа, Африка, Оңтүстік, Солтүстік және Орталық Америкада іріктеу жарыстары өтіп, әлем чемпионатына баратын 16 команда анықталады.

Өткен жылы Сергей Квак дайындаған 14 жасқа дейінгілер арасында Қазақстан жасөспірімдер құрамасы өз тарихындағы ең үздік көрсеткішіне қол жеткізді. Іріктеу сайыстарынан кейін әлем чемпионатына жолдама алған команда шілде айында Чехияның Простеев қаласында өткен дүниежүзілік додада жүлдеге қол созым жерден тоқтап, үздік төрттікке ілікті. Құрама сапында Заңғар Нұрланұлы, Дамир Жалғасбай және Даниэль Тазабеков ойнады. Биыл Заңғар 16 жасқа дейінгілер арасында өнер көрсетпекші.

Қазақстандық жасөспірімдерге сәттілік тілейміз.