Терроризм мен экстремизмнің болашағы жоқ - Елбасы

АСТАНА. ҚазАқпарат - Мемлекет басшысы Нұрсұлтан Назарбаев мемлекеттік органдар басшыларымен және арнаулы мақсаттағы бөлімшелердің командирлерімен өткен кеңес барысында терроризм мен экстремизмнің болашағы жоқтығына сенімді екенін білдірді.

Бұл туралы Ақорданың баспасөз қызметінен хабарлады.

«Әлемде және өңірде болып жатқан соңғы оқиғалар, дүниенің әр тарапындағы террорлық әрекеттер, Таяу Шығыста жалғасып жатқан соғыс қимылдары терроризмге қарсы мемлекеттік іс-қимыл шараларын жетілдіру қажеттігін көрсетіп отыр. Осының бәрі қазір бейбітшілік, келісім және достық жағдайында өмір сүріп жатқан қазақстандықтарды да алаңдатады. Біздің міндетіміз - осы игілікті қорғау», - деді Нұрсұлтан Назарбаев.

Қазақстан Президенті бүгінде дамыған елдердің өзі терроризммен күрес мәселелерінде қиындықтарға тап болып отырғанын, өйткені мұның нақты шекарасы айқындалған кәдуілгі соғыстан өзгеше екенін атап өтті.