TikTok Қазақстанда ЖИ сауаттылығын арттыруға бағытталған жаңа бастаманы іске қосты

TikTok қысқа бейнероликтердің жетекші платформасы жасанды интеллект саласындағы сауаттылықты дамытуға, ЖИ технологиясымен жасалған немесе өзгертілген контенттің ашықтығын арттыруға және ЖИ спамынан қорғанысты күшейтуге бағытталған жаңа жаһандық бастамаларды іске қосатынын жариялады. Осылайша платформа бүкіл әлем бойынша, соның ішінде Қазақстанда пайдаланушыларға жасанды интеллектіні қауіпсіз, сенімді және жауапкершілікпен пайдалануға көмектесуге деген ұмтылысын растайды.

ЖИ адамдардың контентті жасау, үйрену және желіде тілдесу әдетін өзгерткен сайын, TikTok пайдаланушыларға ЖИ әлемінде сенімдірек әрекет етуге көмектесетін құралдарға, серіктестік бағдарламаларға және қауіпсіздік шараларына инвестиция салуды жалғастырып отыр.

— Біздің пікірімізше, адамдар TikTok-та ЖИ негізіндегі контентпен өзара әрекеттескенде контекстті түсінуі керек, бақылауы және сенімділігі болуы керек. Сондықтан біз технологияларды, серіктестік жобаларды және білім беру бастамаларын дамытуды жалғастырамыз, олар бір жағынан пайдаланушыларға ЖИ контентін тани білуге, екінші жағынан генеративті модельдердің жұмыс принциптерін түсінуге және олардың мүмкіндіктерін өздерінің шығармашылық идеяларын жауапкершілікпен және қауіпсіз жүзеге асыру үшін пайдалануға көмектеседі, — деп атап өтті билік органдарымен байланыс және корпоративтік мәселелер бойынша TikTok жаһандық командасының ЖИ бағытының жетекшісі Том Варгезе.

Жасанды интеллектіні жауапкершілікпен пайдалану 

Сарапшылардың пікірінше, ЖИ-ге саналы көзқарасты қалыптастыруда білім беру шешуші рөл атқарады. Сондықтан NAMLE медиа сауаттылық саласындағы білім беру қауымдастығымен және ЖИ мәселелері жөніндегі сарапшы Генри Айдермен бірлесіп, TikTok пайдаланушыларға ЖИ құралдарын жауапкершілікпен қолдануға көмектесетін жаңа нұсқаулық әзірледі.

Сонымен қатар платформада жаңа білім беру хабы пайда болды, онда пайдаланушылар ЖИ өндірген контентті тану бойынша практикалық ұсыныстар ала алады. Технологиялар туралы контент жасаушы Геннадий Захаров @tsifranuty пайдаланушылардың TikTok-тағы ұсыныстар лентасында көретін жасанды интеллект көмегімен жасалған контенттің көлемін қалай басқара алатыны туралы айтып берді. Ал саяхат туралы контент жасаушы Асет Мурзабаев @travelove100 пайдаланушыларға жасанды интеллект көмегімен жасалған контентті кәдімгі контенттен қалай ажыратуға болатынын және оны қосымшаға жүктеген кезде арнайы белгімен белгілеудің неліктен маңызды екенін түсіндіреді.

TikTok сонымен қатар платформадағы білім беру контенті арқылы жасанды интеллект туралы пайдаланушылардың білім деңгейін арттыруға көмектесетін тәуелсіз сарапшылармен және NoFiltr және Raspberry Pi Foundation сияқты мамандандырылған ұйымдармен ынтымақтастықты жалғастыруда. 2025 жылдың қараша айында іске қосылған бағдарламаның шеңберінде пайдаланушыларға ЖИ-ді жақсырақ түсінуге және оны жауапкершілікпен пайдалануға көмектесетін контент 200 миллионнан астам қаралым жинады. Бүгінгі таңда TikTok бастаманы дамытуға 4 миллион доллардан астам қаражат бөлді және оның қамту аумағы мен ықпалын кеңейту үшін қаржыландыруды жалғастырады. 

ЖИ спамына қарсы тұру және түпнұсқа контентті қолдау

Жасанды интеллект шығармашылық пен сторителлинг үшін жаңа мүмкіндіктер ашады. Алайда технологиялардың дамуына қарай, ол түпнұсқа контенттің авторларын ығыстыратын және пайдаланушылардың сенімін төмендететін спамды жаппай өндіру үшін де теріс пайдаланылуы мүмкін. Жаңа сын-тегеуріндерге тиімді қарсы тұру үшін TikTok ЖИ спамын жаппай жариялайтын есептік жазбаларды анықтаудың жетілдірілген жүйелерін сынап жатыр.

Бұл шешімдер платформаның спамды анықтау және жою жөніндегі қолданыстағы құралдарын толықтырады. Тек 2026 жылдың бірінші тоқсанында TikTok бүкіл әлем бойынша 86 миллионнан астам жалған аккаунттарды жойып, осындай бұзушылықтарды анықтау тетіктерін жетілдіруді жалғастырды. TikTok түпнұсқа контенттің авторлары сәтті дамып, өз аудиториясын таба алатын шынайы цифрлық ортаны құруға тырысады.

ЖИ контенттің ашықтығын арттыру

Content Credentials жүйесінің, креаторлардың ЖИ контентін таңбалау құралдарының және көрінбейтін цифрлық сәуле белгілері технологиясының үйлесімі арқылы бүгінгі күні TikTok-та үш миллиардтан астам бейнероликтер ЖИ көмегімен жасалған деп белгіленген. Бұл пайдаланушыларға бейнеролик жасанды интеллектінің көмегімен қашан жасалғанын немесе айтарлықтай өзгертілгенін түсінуге көмектесетін өндірілген контенттің ашықтығын дамытудағы маңызды кезең.

Екі жыл бұрын TikTok платформасы Coalition for Content Provenance and Authenticity (C2PA) әзірлеген Content Credentials жүйесін енгізген алғашқы бейнеплатформа болды. Бұл технология контенттің ЖИ көмегімен жасалғанын немесе айтарлықтай өңделгенін анықтауға мүмкіндік береді. Қазірдің өзінде қол жеткізілген жетістіктерге сүйене отырып, TikTok платформасы C2PA Басқарушы комитетінің құрамына кірді. Коалицияның басқа мүшелерімен бірге компания бүкіл цифрлық экожүйеде ЖИ контентінің ашықтығын арттыратын технологияларды кеңінен енгізуге ықпал етеді.

ЖИ көмегімен пайдаланушылардың мүмкіндіктерін кеңейту

Аталған жаңартулар TikTok-тың платформада ЖИ технологияларын қауіпсіз және оң пайдалануды қамтамасыз ету бойынша кеңірек жұмысының бөлігі болып табылады. TikTok Smart Split және AI Outline сияқты ЖИ негізіндегі шығармашылық құралдарды әзірлеуге инвестиция салуды жалғастыруда, сонымен қатар пайдаланушыларға ЖИ көмегімен жасалған контенттің қаншалықты өз арнасында көргісі келетінін өз бетінше реттеуге мүмкіндік беретін «Тақырыптарды басқару» сияқты функцияларды сынап жатыр. Мұндай технологиялардың даму шамасына қарай платформа TikTok қауіпсіздікті қалай қамтамасыз ететіні, пайдаланушыларға қызықты контентті табуға қалай көмектесетіні және шығармашылық мүмкіндіктерін қалай кеңейтетіні туралы ақпаратпен бөлісуді жалғастырады.

Қазақстанда жұмыс істейтін TikTok, YouTube және басқа да цифрлық платформалар ұлттық заңнама талаптарын, соның ішінде жасанды интеллект көмегімен жасалған контентті таратуға қатысты нормаларды сақтауға міндетті. Бұл туралы ҚР Жасанды интеллект және цифрлық даму вице-министрі Бақтияр Мұхаметқалиев айтқан болатын.