Тимур Сүлейменов ҚҚС-ны көтеру туралы жаңалықтар инфляцияға қалай әсер етіп жатқанын айтты

АСТАНА. KAZINFORM — Ұлттық банк төрағасы Тимур Сүлейменов елдегі салық реформасы туралы талқылаулар халық ішіндегі инфляция болжамдарына қалай әсер етіп жатқанын айтты.

— Халықтың ішінде инфляциялық күтуінің жоғарылауына жанар-жағармайды мемлекет бақылауынан шығару туралы жаңалықтар, теңге бағамының әлсіреуі, салық реформасының төңірегіндегі қызу талқылаулар, оның ішінде ҚҚС-ны көтеру мәселесі, сондай-ақ, тұрғын үй-коммуналдық секторда тариф реформасының жалғасуы әсер етті, — деді ол.

Ұлттық банк басшысы алдағы 5 жылға инфляциялық күтулер екі таңбалы мөлшерден еркін асып тұрғанын айтты.

— Инфляциялық күтулер жоғары күйінде қалып отыр, алдағы жылға 13,7 пайыз деңгейінде бағаланады. Ал халықтың инфляцияны сезінуі 12,4 пайызға дейін жеделдеді. Қаңтар айында бұл көрсеткіш 11,3 пайыз болатын. 5 жылдықтың инфляциялық күтулері 13,5 пайыз болады деген болжам бар, — деді Тимур Сүлейменов.

Бүгін ұлттық банк базалық мөлшерлемені көтерген болатын.