Тимур Сүлейменов зейнетақы қоры қанша инвестициялық табыс тапқанын айтты

АСТАНА. KAZINFORM – ҚР Ұлттық банк төрағасы Тимур Сүлейменов Бірыңғай жинақтаушы зейнетақы қорының қанша инвестициялық табыс тапқанын айтып берді.

«Бірыңғай жинақтаушы зейнетақы қорының зейнетақы активтері оң динамиканы көрсетіп жатыр. Жыл басынан бері зейнетақы активтері 18,4 трлн теңгеге дейін немесе 3,6% өсті. Инвестициялық табыс көлемі 351,1 млрд теңге болды. Зейнетақы жарналары 396,4 млрд теңге, ал жарнаны мерзімінен бұрын алу сомасы 66,5 млрд теңге болды», - деді Т. Сүлейменов Үкіметтің бүгінгі отырысында.

Сонымен бірге, спикердің айтуынша, Ұлттық Банктің алтын-валюта резервтері алтын сатып алуға байланысты жыл басынан 36,2 млрд долларға дейін немесе 0,5% ұлғайды.

«Ұлттық қор активтері жыл басынан бері 60,2 млрд доллар болды. Бұл ретте, ақпан айының қорытындысы бойынша 1,44% немесе 0,87 млрд доллар инвестициялық табыс түсті», - деді Ұлттық банк төрағасы.

Бұған дейін Тимур Сүлейменов жылдық инфляция 9,3% дейін баяулағанын және Ұлттық Банк базалық ставканы 14,75% дейін төмендеткенін баяндаған еді.