ТМД-ға мүше мемлекеттер басшылары бірлескен мәлімдеме жасайды
НҰР-СҰЛТАН. ҚазАқпарат - ҚР Сыртқы істер министрі Бейбіт Атамқұлов ТМД СІМ кеңесінің кезекті отырысына қатысады. Бұл туралы бүгін ҚР Сыртқы істер министрлігінің ресми өкілі Айбек Смадияров айтты, деп хабарлайды ҚазАқпарат тілшісі.
«ҚР Сыртқы істер министрі Бейбіт Атамқұлов 5 сәуірде Мәскеуде Түрікменстанның төрағалығымен өтетін ТМД СІМ кеңесінің кезекті отырысына қатысады. Іс-шара аясында ТМД-ға қатысушы мемлекеттердің сыртқы саяси ведомство басшылары халықаралық және өңірлік күнтәртіптегі кең ауқымды мәселелерді, Достастық аясындағы ынтымақтастықты дамыту, соның ішінде ғылыми зерттеу, гуманитарлық салалардағы өзара іс-қимылды одан ары нығайту мәселелерін талқылайды», - деді ол.
Оның атап өтуінше, отырыс қорытындысы бойынша ТМД-ға қатысушы мемлекеттердің сыртқы саяси ведомстволары арасындағы әріптестікті жандандыру жөніндегі іс-қимыл бағдарламасы және 2019 жылға арналған ТМД аясындағы көпдеңгейлі сыртқы саяси кеңестердің жоспары қабылданбақ. Мұнан өзгеде бірқатар құжат қаралмақ.
«Сыртқы ведомство басшылары 1941-1945 жылғы екінші дүниежүзілік соғыстың әскери жерлеу орындары мен әскери ескерткіштерді сақтау және тиісінше күтіп ұстау қажеттігі туралы өтінішті, сонымен қатар аталған соғыстың басталуының 80 жылдығына орай ТМД-ға қатысушы мемлекеттер басшыларының мәлімдемесі жобасының мәтінін қарайды деп күтілуде», - деді А.Смадияров.
