ТМД мемлекеттері Ақпараттық қауіпсіздікті қамтамасыз ету стратегиясын талқылайды
МӘСКЕУ. ҚазАқпарат - 2019 жылдың 15 наурызында Мәскеуде Тәуелсіз мемлекеттер достастығы Экономикалық кеңесінің 81-ші отырысы өтеді. Отырысқа Түрікменстан төрағалық етеді, деп хабарлайды ҚазАқпарат.
ТМД Атқару комитеті баспасөз қызметінің ақпараты бойынша, күн тәртібінде ТМД елдерінің экономика саласындағы өзара қарым-қатынасының кешенді мәселелері талқыланады. Атап айтқанда, Тәуелсіз мемлекеттер достастығы елдерінің Ақпараттық қауіпсіздігін қамтамасыз ету стратегиясын әзірлеу мәселелері талқыланбақ.
Сондай-ақ, электрондық сауда саласында тұтынушылар құқығын қорғау мәселелеріне ерекше көңіл бөлінеді.
Бұдан бөлек, жиында ТМД-ға мүше мемлекеттердің кеден органдарының зияткерлік меншік құқықтарын қорғау саласындағы ынтымақтастығы талқыланады.
ТМД Экономикалық кеңесіне ұйымға мүше елдердің үкімет басшыларының орынбасарлары кіреді. Оның отырысына ТМД Атқару комитетінің төрағасы - атқарушы хатшысы қатысады.
