Тоқаев штабы оралдық жұмысшыларға сайлауалды бағдарламасын таныстырды
ОРАЛ. ҚазАқпарат - Президенттікке үміткер Қасым-Жомарт Тоқаевтың Республикалық қоғамдық штаб өкілдері Батыс Қазақстан өңірінде кездесу өткізді, деп хабарлайды штабтың баспасөз қызметі.
Алғашқы кездесу «Батыс Қазақстан машина жасау компаниясы» АҚ-да өтті. Қоғамдық штабтың жетекшісі Мәулен Әшімбаев басқосу барысында кандидаттың сайлауалды бағдарламасы туралы жан-жақты айтып берді.
РҚШ басшысы Қасым-Жомарт Тоқаевтың Тұңғыш Президент - Елбасы Нұрсұлтан Назарбаев қолға алған бағытты жалғастыратынына айрықша тоқталды. Сондай-ақ, кандидаттың өз бағдарламасында Қазақстанның стратегиялық әріптес саналатын бірқатар мемлекеттермен тиімді қарым-қатынасты дамытуды көздеп отырғанын тілге тиек етті.
Айта кетейік, «Батыс Қазақстан машина жасау компаниясы» - Орал аймағындағы экономикалық секторды көтеруге үлес қосып келе жатқан 30 жылдық тарихы бар бірегей кәсіпорын. Қазақстандағы мұнай мен газ тасымалына, энергетикалық құрылғылар мен құрылыс саласына қажет жоғары технологиялық құрал-жабдықтар осында өндіріледі. Мұнда мыңнан астам батысқазақстандық еңбек етеді.
