Тоқаев: Ұлттық қор Үкіметті босаңсытып отыр

АСТАНА. ҚазАқпарат - Үкімет Ұлттық қор қаржысына қатты сеніп кетті. Бұл туралы «Теңдестірілген және ашық бюджет - елдің табысты және орнықты әлеуметтік-экономикалық дамуының кепілі» атты парламенттік тыңдауда Сенат төрағасы Қасым-Жомарт Тоқаев мәлім етті, деп хабарлайды ҚазАқпарат.

Ұлттық қор қаржысын пайдалану мәслесіне ерекше назар аудару керектігіне тоқталған Сенат төрағасы, «бірқатар сарапшылардың пайымынша, Ұлттық қор қаржысын пайдаланудың қазіргі тәжірибесі ұзақ мерзімді перспективада Үкіметтің экономикалық саясаты тиімділігінің төмендеуіне алып келуі мүмкін. Бұған ағымдағы проблемаларды жедел шешу үшін тұрақты қаржы көзінің болуы (Ұлттық қордан) ықпал етуде. Басқаша айтқанда, Ұлттық қор Үкіметті босаңсытып отыр», - деді.

Спикердің сөзіне қарағанда, қазіргі кезде республикалық бюджеттің 46 пайызын Ұлттық қордан келетін трансферттер құрайды. Бұл өз кезегінде бюджеттің мұнайдан түсетін қаржыға айтарлықтай тәуелділігін байқатуда.

«Біз экономиканы басқа жағдайларда дамытуға дағдылануымыз керек. Осы орайда экономикалық өсімнің жаңа моделін құрып, бәсекелестік пен нарық жағдайларында өмір сүруге үйренуіміз қажет. Бұл стратегиялық мақсатқа Президенттің Үшінші жаңғыруы негізделген», - деді Тоқаев.