Төлем терминалдары арқылы темір жол жүру билеттері сатыла бастады
АСТАНА. 2 наурыз. ҚазАқпарат - Бүгін Астанадағы темір жол вокзалында жолаушыларға билет сатудың жаңа қызметі іске қосылды.
Енді, астаналықтар сан алуан қызметтер төленетін төлем терминалдары арқылы қолма-қол ақшаға темір жол жүру билетін ала алады.
Әзірше ондай терминалдар Астана мен Алматы қалаларының темір жол вокзалдарында іске қосылып отыр. Оған қолма-қол ақшаны енгізу арқылы жолаушылар арнайы токен, яғни төлем түбіртегін алады. Онымен кез келген кассаға барып, жол бүру билетін кезексіз алуға болады. «Ал «Тұлпар» пойызына түбіртек алған азаматтар билетті алмай-ақ бірден міне алады. Себебі онда автоматтандырылған жүйе бар. Сондықтан жолаушылар жеке куәлігі мен төлем түбіртегін көрсетсе де болады», - дейді «Жолаушылар тасымалы» АҚ Стратегиялық даму жөніндегі атқарушы директоры Асылхан Қалдыкөзөв. Бұдан басқа, төлем терминалдарынан пойыздың жүру кестесі мен бос орындар туралы толық ақпаратты алуға болады.
«Жолаушылар тасымалы» АҚ-ның жоспарына сәйкес, осы айдың ішінде республика бойынша темір жол жүру билеттерін сатып алуға мүмкіндік беретін 1 мың терминал ашылады. Жылдың соңына дейін ондай қондырғылардың санын 3 мыңға дейін жеткізу көзделген.
