Төлен Тілеубайдың «Тәуелсіздік - тұмарым» атты кітабының тұсауы кесілді
Аталған шараға саясаттанушы Кенжеболат Жолдыбай, журналист Талғат Батырхан, дінтанушы-ғалым Омар Жәлел, белгілі журналист Мейрамхан Жапек қатысты.
Жаңа жинақ Қазақстан Тәуелсіздігінің 25 жылдығына орай «BAQORDA» баспасынан басылып шықты. Оған автордың әр жылдары қазақ баспасөзінде жарияланған сұхбаттары, сараптамалық мақалалар және публицистикалық шығармалары топтастырылған.
«Тәуелсіздік - тұмарым» - журналистің екінші жинағы. Бұған дейін оның «Өлке» баспасынан «Аласапыран Америка» атты тұңғыш кітабы жарыққа шыққан болатын.
Айта кетейік, Т.Тілеубай Қарағандыда жарық көрген «Сана», республикалық «Астана ақшамы», «Жас қазақ» газеттерінде, «Қазақстан темір жолы» ұлттық компаниясында, ҚР Премьер-Министрі Кеңсесінің Үкіметтік басылымдар редакциясында қызмет еткен. Ол «Еуразия сақинасы» атты Еуразия жастарының ақпараттық форумының дипломанты, «Шабыт - 2003» халықаралық шығармашыл жастар фестивалінің «Журналистика» аталымы бойынша Гран-При иегері.
