Төлеубай Шектібаев: Соғысқа аттанғанда бәріміз 18 жаста ғана болдық

ТАЛДЫҚОРҒАН. ҚазАқпарат - Жетісу облысының орталығы Талдықорғанда көзі тірі үш ардагер болса, солардың бірі - Төлеубай Шектібаев. Қарт майдангер қан майданға аттанғанда қатарластарының барлығы 18 жастағы бозбала болғанын еске алды, деп хабарлайды ҚазАқпарат тілшісі.

«Соғысқа аттанғанда барлығымыз жас баламыз. 18 жастағы қатарластарымызбен жаудан жерімізді қорғадық. Халқыма соғысты көрсетпесін. Халқымның амандығын, елімнің тыныштығын тілеймін», - деп ақ батасын соғыс ардагері Төлеубай Шектібаев.

Төлеубай Шектібаев майдан даласына 18 жасында аттанған. Жас сарбаз 1943-1944 жылдары Амур маңындағы Қиыр Шығыс шекарасын қорғаған. Мажарстандағы Балатон өзеніне дейін неміс басқыншыларынан азат ету ұрысына қатысқан.

Ал 1945 жылы 83-ші атқыштар дивизиясының құрамында жапон әскеріне қарсы соққы беріп, Харбин қаласын азат етушілер қатарында болды. І дәрежелі Отан соғысы орденімен, «Ерлігі үшін» медалімен наградталды. 98 жастағы ардагер 4 бала өсіріп, олардан немере-шөбере сүйіп отыр.

Еске салсақ, Жетісу облысында тұратын Ұлы Отан соғысының қатысушылары мен тыл еңбеккерлерінің жалып саны – 2309, соның сегізі – майдангер. Олардың бәріне Жеңіс күніне орай жалпы сомасы 156,7 млн теңге болатын материалдық көмек берілді.