«Толқысын шартарап» ән байқауының жеңімпаздары анықталды

ТҮРКІСТАН. ҚазАқпарат – Түркістан облысында вальс королі Шәмші Қалдаяқовтың 90 жылдығына орай ұйымдастырылған «Толқысын шартарап» атты республикалық ән байқауының жеңімпаздары анықталды. Облыстық «Жастар ресурстық орталығы» ұйымдастырған өнер сайысына еліміздің әр өңірінен 40-қа жуық үміткер қатысты, деп хабарлайды ҚазАқпарат тілшісі.

Байқау жеңімпаздарын марапаттау рәсімі Қазақстан Ресрубликасының Халық әртісі Ш.Қалдаяқовтың туған өлкесінде өтті. Салтанатты шараға орталық басшысы мен арнайы қонақтар қатысты.

Жастар ресурстық орталығының басшысы Амалбек Өміртай композитордың шығармашылығына тоқталып, алдағы уақытта да сазгер мұрасы насихаттала беретінін атап өтті.

«Бұл өнер сайысының өзге жарыстардан ерекшелігі онлайн режимде өткізілгенінде. Карантинге байланысты байқауды осындай жолмен өткізуді жөн санадық. Мұндағы мақсат - жастардың бос уақытын тиімді пайдаланып, сазгер Шәмші атамыздың мол мұрасын ел ішінде насихаттау болатын. Мақсат орындалды деген сенімдемін. Ұлыларымызды ұлықтауға арналған шаралар мұнымен шектелмейді», – дейді А.Өміртай.

Байқаудың бірінші кезеңінде белгілі сазгерлер мен сахна тілі мамандары үздік 10 қатысушыны іріктесе, екінші айналымда жүлдегер үштікті көрермендер дауыс беру арқылы анықталды. Мәдени сайыстың қортындысымен І орынды Аяулым Қойшыбай алса, ІІ орын «Қос-Тұра» дуэтіне бұйырды. Ал, Айдос Әлқуат ІІІ орынды қанағат тұтты.

Байқау жеңімпаздарына арнайы алғыс табысталып, қаржылай сый-сияпат жасалды. Айта кетейік, шара аясында сазгердің құрметіне ашылған «Шәмші үйіне» онлайн саяхат жасалды.

Жақында ғана ашылған «Шәмші үйіне» композитор мен отбасына тиесілі жүзден аса дүние қойылған.